O Consello de Ministros aprobou un Real Decreto-Lei de medidas de sustentabilidade económica, que inclúe un Plan de Choque de Aforro e Xestión Enerxética en Climatización para reducir o consumo de enerxía en edificios administrativos, recintos públicos e comercios e facilitar o cumprimento dos compromisos europeos derivados do conflito en Ucraína, segundo explicou a vicepresidenta terceira e ministra para a Transición Ecolóxica e o Reto Demográfico, Teresa Ribera.
A refrixeración destes edificios non se poderá poñer por baixo dos 27 graos centígrados nin a calefacción por encima dos 19. As portas de acceso aos locais terán peches automáticos e as luces dos escaparates apagaranse ás 10 da noite. Ademais, os inmobles terán que facer unha revisión extraordinaria das súas caldeiras e instalacións térmicas antes do 31 de decembro de 2022, se a última fixérona antes de xaneiro de 2021.
A norma tamén inclúe medidas para substituír os combustibles fósiles por renovables. Con este obxectivo, axilizaranse as tramitacións das redes e infraestruturas eléctricas, facilitarase a inxección de gases renovables na rede de gasodutos e potenciarase o almacenamento e o autoconsumo. «Non nos podemos permitir o luxo de perder un só quilowatt-hora», afirmou Teresa Ribera.