- Abordouse a necesidade de adaptar a cidade ao escenario actual
O Pazo de Exposicións e Congresos (Palexco) de A Coruña acolleu na tarde deste martes o I Encontro Profesional de Turismo «Fase A Coruña» tras o Estado de Alarma, no que participou a alcaldesa, Inés Rey, para abordar a necesidade de adaptar a cidade ao novo escenario pos Covid-19 con todos os retos que isto supón para a administración local. A rexedora falou de cambios no comportamento dos visitantes, que están agora máis concienciados en materia ambiental e preocupados pola seguridade nos seus desprazamentos.
Rey sinalou a importancia da colaboración público-privada no sector turístico e da creación dun Convention Bureau que sirva de plataforma de captación de eventos profesionais. Ademais, lembrou o potencial da Coruña a nivel infraestruturas cun «Pazo de Congresos, ExpoCoruña, a lonxa e o porto, unha excelente rede hoteleira e hostaleira, unha atractiva oferta turístico-cultural complementaria e sobre todo, uns grandes profesionais do sector».
Para a alcaldesa, esta xornada converte A Coruña na primeira cidade en aplicar as directrices hixiénico-sanitarias para o sector congresos e supón un punto de encontro en que intercambiar coñecementos e experiencias cos principais axentes do sector coruñés, galego e outros destinos turísticos de proximidade como Xixón, Braga e Porto.