Telefónica dotará de FTTH ao Parador de Turismo de Muxía, de forma que contará con banda ampla ultrarrápida desde os primeiros días xullo. Paradores de Turismo de España seleccionou a Telefónica, a través dun concurso público, como socio tecnolóxico único para culminar a súa dixitalización, implantando unha rede de alta dispoñibilidade e banda ampla ultrarrápida nos 97 emprazamentos que a hostaleira pública ten repartidos en 16 comunidades autónomas.
Ata o de agora, a infraestrutura de rede nestes edificios dependía de varios provedores de telecomunicacións e tiña un limitado ancho de banda. Isto, unido á complicada orografía na que se sitúan -moitos en lugares remotos- e á propia arquitectura dos edificios -boa parte deles históricos-, limitaba a cobertura e dificultaba o acceso mesmo a funcionalidades básicas.
O proceso de implantación da fibra óptica avanza a moi bo ritmo. Nos últimos dous meses, Telefónica levou a banda ampla a 31 edificios que non contaban con ela, polo que 71 Paradores dispoñen xa desta tecnoloxía. Estímase que a primeiros de xullo estea instalada nos 97 establecementos da rede de Paradores.