O reconto do voto emigrante xa finalizou na provincia de Ourense e, aínda que era a única na que podería variar un escano, confírmase que a repartición de actas manterase en idénticos termos á noite electoral.
O PPdeG contará cunha maioría absoluta de 40 deputados no Pazo do Hórreo, fronte a 25 do BNG, nove do PSdeG e un de Democracia Ourenssana. En concreto, aínda que o PSdeG tiña expectativas de arrebatar un escano ben ao PPdeG ou ao BNG, concluído o escrutinio dos residentes ausentes ratifícase que os populares conservan os oito representantes que obtiveron na noite electoral, e o BNG as súas catro actas, mentres que PSdeG e DO seguirán cun escano en cada un dos casos.
Na provincia da Coruña, do total de 164.851 electores do CERA, votaron un total de 8.233 persoas, dos que 80 foron nulos e 77 en branco. Na de Pontevedra, do total de 138.197 electores, votaron 7.466 persoas. Das que 94 optaron por un voto nulo, e 84 por un voto en branco. Na de Lugo, dun total de 69.660 persoas censadas, só votaron 2.714 persoas. Rexistráronse 24 votos nulos e 31 en branco.