Galicia vai estrear o programa YAM do Instituto Karolinska, que está recoñecido como o protocolo con mellores resultados para previr as condutas autolesivas e suicidas entre a mocidade. Comezará a aplicarse nos institutos galegos o curso que vén. Os protocolos actuais xa actúan no ámbito educativo, pero o modelo do instituto sueco Karolinska ten resultados testados na diminución da incidencia.
Pretende dotar os mozos de ferramentas emocionais e aumentar a súa capacidade para resistir o estrés e as situacións dolorosas. O incremento do malestar emocional tras a pandemia, especialmente entre os 12 e os 18 anos é un dos asuntos que máis preocupa ás autoridades sanitarias.
As intervencións nos institutos estarán dirixidas por especialistas en psicoloxía, pedagoxía e psiquiatría infantil, fundamentais nese labor de detección, apoio e acompañamento. Hai axuda e hai saída e un teléfono 24 horas para conseguila xa, o 024.