- Coa anterior medida, os traballadores perderían o 25% do seu salario
Este martes a redacción de NHDIARIO facíase eco da denuncia da CIG sobre a situación laboral do persoal sanitario que traballa no Servizo Galego de Saúde (Sergas).
En concreto, o sindicato aseguraba nun comunicado que o Sergas non prorrogaba o contrato do persoal temporal que traballaba nas unidades de COVID-19 se estaban cunha baixa por incapacidade temporal (IT) por contaxio do virus.
Con esta medida, estes traballadores deixaron de computar este período de incapacidade temporal como servizos prestados a efectos de baremación para as oposicións e perderon o 25% do seu salario.
Pero esta situación mudou, segundo informan este mércores desde o xornal Praza Pública, quen tivo acceso á unha circular da xerencia do Sergas na que aclara que o persoal temporal que estea de baixa ou illamento polo coronavirus manterá a súa relación laboral co Sergas, que lle será prorrogada, polo menos, ata que reciba a alta médica.