A renuncia de ERC, PNV e EH Bildu a presentar emendas á totalidade contra os Orzamentos Xerais do Estado de 2023 antes do prazo fixado para as 14:00 horas deste venres achanda o camiño ao Goberno para a aprobación das contas públicas, cuxa primeira votación no Congreso está prevista para o vindeiro xoves. O PP e Vox quedan ancorados no non é non.
Os socios de investidura advertiron ao Executivo de que estas decisións non anticipan o seu voto favorable todo indica que o Goberno contará apoios suficientes para rexeitar as emendas á totalidade que nas últimas horas presentaron Partido Popular, Vox, Cidadáns, Junts, a CUP Foro Asturias e os deputados expulsados de UPN. A decisión de ERC, PNV e EH Bildu súmase á doutros sete partidos que xa decidiran non emendar o proxecto do Goberno: PDeCAT, Máis País-Equo, Compromís, Coalición Canaria, o BNG, o Partido Rexionalista de Cantabria (PRC) e Teruel Existe.
ERC e Bildu xustificaron a súa decisión de non obstaculizar o camiño dos orzamentos co fin de que continúen as negociacións antes da votación definitiva, prevista para decembro. O PNV renunciou ao veto tras alcanzar un acordo co Goberno para renovar a Lei da Cota vasca nos mesmos termos que a actualmente en vigor, asinada en 2017.