Dúas persoas resultaron feridas e tiveron que ser trasladadas ao Complexo Hospitalario Universitario da Coruña.
O 112 Galicia tivo constancia do accidente ás 11:15 horas deste domingo, cando un particular solicitou axuda para os implicados nun choque entre dous vehículos na AC-400, no quilómetro 13, ao seu paso pola parroquia de Soandres, no concello da Laracha. Durante a chamada, o alertante indicaba que podería haber persoas atrapadas no interior de ambos turismos.
De inmediato, desde a sala de operacións do Centro Integrado de Atención ás Emerxencias 112 Galicia mobilizouse ao Servizo de Urxencias Sanitarias de Galicia-061 e aos Bombeiros de Bergantiños. Tamén foron informados os axentes da Garda Civil de Tráfico, da Policía Local e os efectivos de Protección Civil.
Unha vez no lugar, os bombeiros confirmaron que había unha persoa atrapada no interior de cada un dos vehículos implicados. Para liberar a unha delas foi necesario empregar material de excarceración, mentres que a outra conseguiu saír do turismo polos seus propios medios.
Ambas persoas feridas foron posteriormente trasladadas polo persoal sanitario ao Complexo Hospitalario Universitario da Coruña para recibir atención médica.