O sector pesqueiro e marisqueiro galego recolleu entre os anos 2020 e 2021 preto de 120 toneladas de lixo das costas galegas ao abeiro de trece proxectos colectivos desenvolvidos no marco das convocatorias de axudas autonómicas para accións de protección e recuperación da biodiversidade e dos ecosistemas mariños mediante a recollida de residuos no mar. Estas accións poden ser desenvolvidas por confrarías de pescadores, organizacións de produtores pesqueiros e outras entidades asociativas do sector en Galicia como as ONG en alianza coas entidades do sector ou conxuntamente cos grupos de acción local do sector pesqueiro (GALP). As actividades de limpeza realizáronse nun total de 125 días entre 2020 e 2021 e nelas participaron máis de 500 persoas, unhas 270 persoas mariscadoras a pé e catro embarcacións na recollida activa de lixo e case 260 persoas e oito embarcacións na retirada pasiva. O seu labor contribuíu a retirar esas preto de 120 toneladas de refugallos entre as que se atopaban preto de 32.000 quilos de produtos naturais (como algas, pólas ou paus de madeira, entre outros), máis de 22.000 quilos de elementos de plástico ou preto de 16.000 quilos de vidro ou cerámica. A eles engádense residuos téxtiles, de metal, goma ou doutros materiais variados.
33