A Fundación Fernando Blanco de Lema de Cee, coa colaboración da Deputación Provincial da Coruña, desenvolverá ao longo de todo o mes de outubro a 10ª Edición do Programa Educativo Cultural “O Mes da Fundación. Outubro 2023”.
No ano 2013 os integrantes do Padroado da centenaria entidade ceense decidiron celebrar dun xeito especial o mes de outubro por ser este un mes cargado de simbolismo para a Fundación e para a vila de Cee, pois nel aconteceron dous dos feitos mais relevantes da historia da vila: o nacemento de Fernando Blanco de Lema un 18 de outubro de 1796 e a inauguración do Instituto que merecidamente leva o seu nome un 2 de outubro de 1886.
Ao longo de todo este tempo, e nas distintas edicións do programa, (celebráronse de xeito ininterrompido, agás a edición de 2020 que se tivo que cancelar por mor da pandemia) , pasaron por Cee personalidades relevantes nas súas distintas áreas de traballo a nivel autonómico, nacional e internacional, compartindo o seu saber con todos os asistentes ás distintas actividades que se programaron. Historia, ciencia, literatura, medicina e un longo etcétera foron algunhas das temáticas abordadas nas edicións pasadas, tendo sempre un protagonismo destacado a música e o teatro, por seren ambas as dúas grandes herdanzas culturais que naceron ao abrigo dos centenarios muros de pedra do Instituto Fernando Blanco e que hoxe, mais dun século despois, seguen a estar moi vivas e presentes no día a día da vila.
Paula Carballeira con «Mulleres que viven soas» abriu esta 10ª Edición do programa O Mes da Fundación no seu apartado para o público en xeral. Este mércores 11, abre a sección dos colexios de Cee cunha sesión de maxia infantil titulada «Ledicias 2.0» a cargo do Maogo paco (enviamos cartel) e á que asisten os alumn@s de 3ª e 4º de Primaria do Colexio Manuela Rial Mouzo e CEIP Vila de Cee.