- Gavi, a OMS e UNICEF instan a continuar coas campañas de vacinación contra enfermidades mortais que se poden evitar con vacinas
A pandemia da COVID-19 está a causar graves problemas no ámbito económico, social e sanitario, entre eles, a interrupción dos servizos esenciais de inmunización en todo o mundo. Como consecuencia, millóns de nenos (tanto de países ricos como de países pobres) están en perigo de contraer enfermidades como a difteria, o sarampelo e a poliomielitis.
Trátase da grave advertencia da Organización Mundial da Saúde, UNICEF e Gavi, a Alianza para as Vacinas, con motivo do Cume Mundial sobre as Vacinas que se celebrará o próximo 4 de xuño, e que reunirá aos dirixentes mundiais para tratar de manter os programas de inmunización e mitigar o impacto da pandemia sobre os países de baixos ingresos.
Segundo os datos recompilados pola Organización Mundial da Saúde, UNICEF, Gavi e o instituto para as vacinas Sabine Vaccine Institute, a prestación de servizos sistemáticos de inmunización perturbouse considerablemente en polo menos 68 países, o cal podería afectar aos aproximadamente 80 millóns de nenos menores dun ano que viven neses países.
Dos 129 países dos que había datos dispoñibles, en máis da metade (un 53%) rexistráronse interrupcións entre moderadas e graves ou a suspensión total dos servizos de vacinación durante os meses de marzo e abril de 2020.
“A inmunización é un dos instrumentos de prevención de enfermidades máis poderosos e fundamentais da historia da saúde pública”, asegurou o Dr. Tedros Adhanom Ghebreyesus, Director Xeral da Organización Mundial da Saúde. “A interrupción dos programas de inmunización pola pandemia da COVID-19 podería paralizar décadas de avances contra enfermidades que poden evitarse con vacinas, como o sarampelo”.
As razóns que explican a interrupción dos servizos varían. Algúns pais móstranse remisos a saír das súas casas polas restricións aos desprazamentos, a falta de información ou porque temen infectarse co virus da COVID-19. Ademais, non todos os traballadores sanitarios están dispoñibles debido ás restricións ás viaxes ou por ser recolocados para dedicarse aos labores de resposta á COVID-19. Noutros casos, hai escaseza de equipos de protección.