A vicepresidenta e ministra para a Transición Ecolóxica e o Reto Demográfico, Teresa Ribeira, presentou o balance climático do verán 2022 elaborado pola Axencia Estatal de Meteoroloxía (AEMET). O estudo advirte de que a tendencia de temperaturas máis cálidas continuará durante o outono.
No encontro, realizado na sede da Axencia, a vicepresidenta afirmou que «o cambio climático presiónanos xa, con consecuencias inmediatas, cotiás e de alto impacto que esixen novas medidas de reforzo da nosa resiliencia». No seu balance, AEMET destaca que a temperatura media do trimestre composto por xuño, xullo e agosto de 2022 foi de 24ºC, é dicir, 2,2ºC superior á media normal. Tratouse dun verán extremadamente cálido, o de maior temperatura media da serie histórica, superando por 0,4ºC ao de 2003, o máis cálido ata a data.
O carácter extremadamente cálido do verán ocupou practicamente toda a España peninsular, coa excepción da costa de Galicia e Asturias, o extremo occidental de Andalucía e algúns outros puntos illados, onde tivo un carácter moi cálido. En Baleares, foi extremadamente cálido en Mallorca e moi cálido no resto das illas, mentres que en Canarias resultou en conxunto moi cálido.
Con esta situación, España no seu conxunto terminou o verán en seca meteorolóxica, situación na que permanece desde xaneiro de 2022, e que é máis intensa en áreas do terzo oeste e interior da metade norte peninsular.
