Valencia quixo lembrar ás vítimas do incendio do edificio de 138 vivendas, que ascenderon a dez tras localizarse este sábado un novo corpo. Durante o segundo día de loito oficial na cidade, gardáronse cinco minutos de silencio na praza do Concello a que acudiron veciños, representantes dos servizos de bombeiros e emerxencias e autoridades políticas.
O décimo falecido foi atopado á primeira hora da mañá deste sábado, cando a policía científica e xudicial volveron a entrar no interior do edificio, para inspeccionalo. Á espera da identificación, o corpo podería corresponder á persoa que estaba desaparecida e que se suma aos nove atopados este venres, entre eles unha parella e dous fillos pequenos.
A Delegada de Goberno na Comunitat Valenciana, Pilar Bernabé, indicou que o número de persoas detectadas coincide coa cifra da listaxe de desaparecidos, polo que en principio, non se espera que poidan aparecer máis vítimas. Aínda así, aseverou Bernabé, «revisarase palmo a palmo todo o edificio». Ademais, agradeceu o seu labor tanto aos bombeiros e as forzas de seguridade como ao conserxe da leira, Julián, que se converteu nun heroe inesperado ao chamar porta por porta aos veciños para a súa evacuación.