Un home foi rescatado este mércores na Coruña despois de caer á auga tras envorcar a piragua coa que navegaba, na Ponte Pasaxe, na Coruña.
Foi o mesmo implicado quen chamou ao 112 Galicia para pedir axuda. Indicaba que caera da piragua e que se atopaba na Ponte Pasaxe, na zona da Coruña, agarrado a algo para que a corrente non o arrastrase.
A partir de aí, os xestores de emerxencias pasaron aviso de inmediato a Salvamento Marítimo. Un amplo dispositivo formado polos servizos Sanitarios de Urxencia, Bombeiros da Coruña, Garda Civil, Servizo de GardaCostas de Galicia, Policía Nacional, Policía Local e Protección Civil da Coruña e de Oleiros, desprazáronse ata o lugar ata que, finalmente, un equipo acuático da Garda Civil puido rescatar ao home.
Segundo confirmou persoal de Salvamento Marítimo ao 112 Galicia, o home ao caer quedou enganchado con algo na auga e, tras ser rescatado, foi trasladado nunha embarcación da Garda Civil -con síntomas de hipotermia- ata o Peirao de Oleiros. Así mesmo, un can que tamén navegaba na embarcación foi rescatado a salvo polos axentes.