Esta é a primeira moción de censura que se produce en Galicia tras as pasadas eleccións municipais do 28 de maio, cando aínda non se cumpriron dous meses da toma de posesión dos rexedores posteriores aos comicios. Xuntos polo Irixo e PSOE formalizaron este venres a presentación da primeira moción de censura deste mandato e coa que, previsiblemente, arrebatarán o bastón de mando ao actual alcalde, Manuel Cerdeira (PP). Chegará ao pleno municipal nos próximos dez días. Cando a moción se debata, o PP perderá o goberno da localidade ourensá.
As dúas formacións anunciaran esta mesma semana que presentarían unha moción de censura ao entender que os veciños “apoian maioritariamente un cambio” na alcaldía, posto que Cerdeira, do Partido Popular, volveu tomar posesión como rexedor o pasado 17 de xuño, pero en minoría, co apoio de catro edís fronte aos cinco que suman Xuntos (tres) e PSOE (dous). Antes da toma de posesión de xuño non foi posible alcanzar un acordo que agora si se fraguou cunha repartición do bastón de mando de tres anos para a candidata de Xuntos, Susana Iglesias, e o restante para o portavoz socialista, Iago Fariñas.