A música tradicional e as cantareiras foron as protagonistas do acto institucional do 17 de maio de 2025. O Presidente da Real Academia Galega, Henrique Monteagudo, destacou o seu papel na preservación da cultura e da lingua propia. Felisa Segade, integrante do grupo Leilía, expresou que as pandeireteiras de Mens e, en xeral, todas as cantareiras galegas permitiron manter viva a nosa cultura. O Presidente da Xunta dixo que as homenaxeadas son fieis expoñentes da cultura popular. Ademais, Alfonso Rueda propuxo un gran pacto pola lingua, deixando fóra «as liñas vermellas». O himno galego pechou a homenaxe que se celebrou na contorna das Torres de Mens, en Malpica de Bergantiños.
Malpica tamén acolleu a Sesión Plenaria Extraordinaria e Pública da Real Academia Galega
O presidente da Xunta, Alfonso Rueda, acompañado doutros membros do Goberno galego, presidiu a Sesión Plenaria Extraordinaria e Pública da Real Academia Galega con motivo do Día das Letras Galegas 2025 celebrada no Centro Cívico Cultural de Malpica. A voz e a música das Tanxugueiras inauguraron a sesión, que se celebrou no concello onde naceron as Pandereteiras de Mens, nas que se personifica a homenaxe deste ano. No plenario extraordinario e público da institución o presidente da Real Academia Galega, Henrique Monteagudo, pediu observar ese referente na transmisión xeracional da lingua e apostar por unha reformulación a fondo que poña a infancia e a mocidade no centro da política lingüística. A Real Academia Galega pechou coa interpretación do himno unha gala que pivotou sobre o pasado e o futuro dunha artesanía vocal que se abre aos novos tempos.