O presidente do Goberno, Pedro Sánchez, participou cun vídeo-mensaxe na One Ocean Summit, conferencia internacional celebrada en Brest (Francia), no marco da presidencia rotatoria francesa do Consello da Unión Europea.
O cume ten como obxectivo a promoción de iniciativas para un uso sostible dos océanos, os mares e os recursos mariños; así como sentar as bases que faciliten a adopción de compromisos nas importantes citas internacionais previstas en 2022, como a Conferencia de Nacións Unidas para o Medio Ambiente, do próximo xuño en Lisboa.
Durante a súa intervención, Pedro Sánchez subliñou «o impacto que a saúde dos océanos ten sobre a vida do noso planeta». As «dramáticas» consecuencias do aumento da súa temperatura non deixa lugar a dúbidas: «debemos actuar agora, non podemos esperar por máis tempo». O presidente reclamou medidas de alcance global, como a consecución dun acordo internacional sobre a contaminación por plásticos na próxima Asemblea de Nacións Unidas para o Medio Ambiente.
Neste sentido, anunciou que España unirase formalmente á iniciativa New Plastics Economy Global Commiment, liderada pola Ellen MacArthur Fundation, en colaboración co Programa de Nacións Unidas para o Medio Ambiente. Así mesmo, España impulsa a declaración de novas áreas mariñas protexidas no Océano Austral e apoia a transformación do Mercator Ocean International nun novo organismo internacional que reforce a cooperación entre países e o acceso á información.
España xa se comprometeu no pasado cume One Planet a protexer o 30% da superficie dos océanos para 2030, compromiso que foi reiterado no pasado Cume do G20 de Roma e que se está substanciando en iniciativas impulsadas polo Goberno, como o Plan para un Mediterráneo Exemplar 2030.
O presidente Sánchez recoñeceu o papel desempeñado polos traballadores do mar para asegurar as cadeas de subministración durante a pandemia, e defendeu «coidar e mellorar as súas condicións laborais» como forma de «avanzar cara a un futuro máis xusto e sostible».