O Ministerio de Sanidade propoñerá ás comunidades autónomas o peche perimetral dos seus territorios durante a ponte de San Xosé, como en Semana Santa, para evitar un repunte de casos de coronavirus. As restricións -entre o 17 e o 21 de marzo naqueles territorios nos que sexa festivo o día 19 de marzo e do 26 de marzo ao 9 de abril para todas- deben ser aprobadas no Consello Interterritorial do Sistema Nacional de Saúde deste mércores. A ministra Carolina Darias xa adiantou que busca alcanzar un «consenso», a pesar da oposición da Comunidad de Madrid ás medidas ata o de agora pactadas.
A Comisión de Saúde Pública, na que se atopan representados técnicos de todas as comunidades e cidades autónomas xunto co Ministerio de Sanidade, xa acordaron o peche perimetral e outras medidas para a Semana Santa, aínda que quedaba pendente a ratificación no Consello Interterritorial. Aos peches das comunidades autónomas para os festivos en marzo e abril súmanse outras dúas medidas: o toque de queda a partir das 22 horas e as reunións limitadas a un máximo de catro persoas en espazos públicos e privados. Segundo o documento, as medidas serían “de obrigado cumprimento” en todas as autonomías, excepto nas illas Canarias e Baleares.