Bergantiños, Paiosaco e Fisterra, disputaron este domingo 1 de novembro os seus respectivos partidos de fútbol correspondentes á xornada número tres en Terceira División Grupo 1-A. A sorte foi dispar en canto ao resultado final de cada encontro. O Bergantiños CF presentábase en O Viso, en Arzúa, cuarto na xeral e ante un rival co cal se atopaba empatado a puntos na táboa clasificatoria. Os carballeses comezaron perdendo no minuto 15 do encontro, pero pouco durou a alegría dos locais, cinco minutos máis tarde empataría o Bergantiños por mediación de Agulló no minuto 20, e 11 minutos máis tarde, no 31, Lamelas facíase co encontro tras marcar un novo tanto no minuto 31. Así terminaba a primeira metade e o marcador xa non se movería máis. Importante vitoria para o Bergantiños, que se coloca de cuarto na clasificación xeral, empatado a puntos co Deportivo Fabril que é terceiro. Pola súa banda o UD Paiosaco-Hierros non foi quen de pasar do empate 1-1 na Porta Santa ante o AG Estudiantil, resultado que o mantén no posto número 10 da táboa con dous puntos. Peor sorte correu o Fisterra, que xogaba na casa do Somozas onde perdeu por 2-1. O Somozas afiánzase como líder da clasificación, sen coñecer a derrota aínda, con 7 puntos, o Fisterra mantén a cero o seu marcador no posto número 12.