O presidente de Taiwan, Lai Ching-te, prometeu este xoves defender a soberanía da illa autogobernada fronte ás «ambicións expansionistas» da China, días despois de que Pequín concluíse unhas manobras militases con lume real ao redor da illa. «Ante as crecentes ambicións expansionistas da China, a comunidade internacional está pendente de se o pobo taiwanés ten a determinación de defenderse», dixo Lai no seu discurso de Aninovo do xoves. «Como presidente, a miña postura sempre foi clara: salvagardar firmemente a soberanía nacional, fortalecer a defensa nacional e a resistencia de toda a sociedade, e construír de forma integral un mecanismo eficaz de disuasión e defensa democrática», engadiu. Os comentarios de Lai producíronse días despois de que China concluíse dous días de exercicios ao redor da illa con lanzamentos de foguetes, avións e buques de guerra. Pequín expresara o seu enfado por un proxecto de venda de armas estadounidense a Taiwan, así como polos comentarios do primeiro ministro xaponés de que Tokio podería intervir en caso dun ataque chinés a Taiwan.
10