Á cita «histórica» que marca «un día tremendo para Oriente Medio», segundo Trump, non acudiu representación de Israel nin Hamás, a pesar de que Exipto asegurou que o primeiro ministro israelí, Benjamín Netanyahu, estaría presente. En cambio, entre os presentes atopáronse personalidades como o rei de Xordania, os presidentes de Francia, España e do Consello Europeo; o primeiro ministro británico e o presidente da Autoridade Palestina, Mahmud Abás. Durante o encontro, Trump asegurou que «xa están a traballar na seguinte fase» do cesamento do fogo, a cal prevé implementar os mecanismos de reconstrución do enclave palestino (que asegurou que «xa comezou»), a transición política no enclave e o desarmamento de Hamás.
No medio do esperado cume para a firma da paz en Gaza, Donald Trump aproveitou a súa intervención para lanzar unha nova provocación diplomática, esta vez dirixida ao presidente do Goberno español, Pedro Sánchez.
«Estades a traballar sobre o PIB?», preguntou o mandatario estadounidense, en alusión aos compromisos de gasto en Defensa de España. «Bo, xa chegaremos a iso. Estades a facer un traballo fantástico», engadiu con ton irónico, arrincando algúns sorrisos entre os asistentes e deixando clara a súa molestia coa negativa do Executivo español a elevar o investimento militar ao nivel esixido por Washington.