A Unión de Consumidores de Galicia avaliou a calidade dos operadores de telecomunicacións segundo os datos publicados pola Secretaría de Estado de Telecomunicacións e Infraestruturas Dixitais (SETID) e as estatísticas de reclamacións rexistradas na Oficina de Atención ao Usuario de Telecomunicacións (OAUTEL). Os datos sobre calidade son relevantes na elección de operador porque achegan estabilidade fronte a outros parámetros máis volátiles (como os prezos), ao requirir investimentos continuos para que os progresos se consoliden.
Puntuacións
A Calidade Global é froito da análise dos datos de calidade e reclamacións en telefonía fixa, telefonía móbil e Internet: tempo de subministración, avarías, tempo de resolución das mesmas, caudal de carga e descarga, reclamacións en fixo e móbil, etc. MOVISTAR, con case 7 puntos é o líder da clasificación. É relevante que o operador que soporta a prestación do servizo universal segue sendo o mellor en termos de calidade, con diferenzas de ata o 25% sobre o peor da táboa, grupo EUSKALTEL, que obtén 5,46 puntos, que, do mesmo xeito que o grupo ORANGE (penúltimo da clasificación con 5,58 puntos) queda por baixo dos 6 puntos. VODAFONE e MÁSMOVIL roldan os 6,50 puntos.
No Servizo Móbil suspenden o grupo EUSKALTEL con 4,38 puntos e o grupo ORANGE con 4,45. En ambos os casos castigados polos malos datos de reclamacións. Só MOVISTAR se aproxima ao 6,4; mentres que MÁSMOVIL e VODAFONE móvense ao redor de 5,75, perdendo este último case un punto respecto á anterior edición. No Servizo Fixo ningún operador logra 8 puntos: MOVISTAR, VODAFONE e o grupo MÁSMOVIL móvense aproximadamente entre 7,50 e o 7,25 aproximadamente. Grupo EUSKALTEL e Grupo ORANGE por baixo dos 7 puntos.