O nivel de destrución da rede enerxética de Ucraína é «colosal». Así describe a situación o conselleiro delegado de Ukrenergo, Volodímir Kudritski, que afirma que non quedan no país centrais térmicas e hidroeléctricas que non fosen atacadas. Mentres tanto, os bombardeos continúan en varias partes do país.
No seu habitual informe, o portavoz do ministerio de Defensa ruso, Ígor Konashénkov, acusou a Ucraína de bombardear a central nuclear de Zaporiyia. Ucraína tamén lanzou as mesmas acusacións contra Rusia e, ademais, tamén reclama a desmilitarización do complexo, que está controlado polas tropas rusas desde marzo.
O secretario xeral da OTAN, o noruegués Jens Stoltenberg, advertiu aos aliados que deben estar dispostos a apoiar a Ucraína nunha «guerra longa» a pesar do «prezo» económico que hai que pagar.