Roberto Martínez, primeiro tenente de alcaldía do PP na localidade de Gimenells i o Pla da Font, en Lleida, difundiu en WhatsApp unha fotomontaxe coa imaxe do día do asasinato de John F. Kennedy, na que no canto da cara do presidente norteamericano aparece a de Pedro Sánchez. A foto ademais ía acompañada das frases “tiven un soño” e “espero que teña a mesma puntería”, en clara alusión ao disparo que recibiu Kennedy. Martínez difundiu esa imaxe a través do seu estado de WhatsApp, segundo adiantou o diario Segre. Tras o balbordo xerado, o edil popular retirouna e alegou que era unha broma cun amigo seu e recoñeceu que era “excesiva”, segundo o mesmo xornal.
Entre as críticas que espertou a difusión da fotomontaxe destaca a do presidente do PP de Lleida, Xavier Palau, que quixo rexeitalo “de forma contundente”. “Levaremos a cabo as accións pertinentes para abordar esta cuestión. Os populares de Lleida defendemos a liberdade de expresión dentro dos valores democráticos e pacíficos”, defendeu.