Un veciño de Pontevedra de orixe ghanesa foi condenado a doce anos de prisión por agredir a unha muller que conta cun 65% de discapacidade intelectual.
O acusado, acompañado dunha intérprete, recoñeceu o delito, polo que a fiscalía e a acusación particular rebaixaron as penas.
Segundo os feitos relatados, o acusado estivo conversando coa vítima fóra dun comercio na cidade de Pontevedra e convidouna a tomar algo na súa casa. O autor do delito sabía que a muller, debido á súa discapacidade, non sería capaz de prestar o seu consentimento para manter relacións sexuais, e agrediuna mentres esta se opoñía. A muller contoulle o que pasara ao seu pai e el decidiu denunciar.
A avogada da acusación particular declarou que «[…] A persoa que convive con ela, que é seu pai, deuse de conta de que pasaba algo. Pouco a pouco foillo sacando e, loxicamente, é un feito que non se pode deixar pasar por algo, hai que denuncialo e máis hoxe en día, que estamos sufrindo tantos casos de agresións sexuais».
Ademais da condena, o home deberá pagarlle á vítima dez mil euros e non poderá achegarse a ela durante sete anos.