O rapaz foi trasladado ao Hospital Materno da Coruña nunha UVI móvil. De feito, foi rescatado da auga polos axentes da Policía Local en estado inconsciente.
Unha testemuña do accidente chamou ao 112 Galicia ás 17:30 horas deste luns para pedir axuda. Segundo relatou, o neno saltou dunha altura duns catro ou cinco metros e sufriu un golpe, posiblemente contra o fondo. Ademais de estar inconsciente na auga, sangraba, engadiu a testemuña.
Con esta información, os xestores do Centro Integrado de Atención ás Emerxencias de Galicia solicitaron a intervención de Urxencias Sanitarias de Galicia-061, dos efectivos de Salvamento Marítimo, dos membros do GES de Ponteceso, dos voluntarios de Protección Civil de Malpica e dos axentes da Policía Local.
Precisamente, foi o persoal de seguridade quen sacou o rapaz da auga e, posteriormente, foi atendido polo persoal sanitario. Finalmente, e tras estabilizarse, o menor ferido foi evacuado na ambulancia ao Hospital Materno da Coruña.