A Biblioteca Provincial acolleu a entrega de premios do certame #HoxeEscriboEn 2023. O vicepresidente e deputado de turismo, Xosé Regueira, e a deputada de cultura, Natividad González, entregaron os galardóns ás persoas gañadoras: no primeiro posto, María Luisa Vidal Collazo, por «Estou aquí», un relato referido a Ponteceso; no segundo, Diego Fernández Fernández, por «O desencravo», sobre Betanzos, e no terceiro María José González López, por «El pazo de Goiáns», de Boiro.
O xurado afirmou que o relato gañador «Estou aquí», foi elixido «por ser un texto lírico que expresa con gran beleza os sentimentos e as emocións, co mar como parte da identidade».
O certame #HoxeEscriboEn, convocado pola área de Turismo en colaboración coa Biblioteca provincial, premia ás persoas gañadoras con estadías e experiencias en cabanas e establecementos rurais da provincia e lotes de produtos representativos de selos de calidade e sustentabilidade. O obxecto do concurso é o fomento do talento creativo, a animación á escritura e á lectura, e a difusión do patrimonio cultural e turístico dos concellos da provincia da Coruña.