Os servizos de emerxencias traballaron arreo no lugar e as lapas, que se produciron no garaxe, foron extinguidas. O implicado estaba utilizando unha máquina cando se orixinou o lume e foi rescatado por outra persoa que se atopaba na zona.
O 112 Galicia tivo constancia dos feitos minutos antes das 13:30 horas deste martes, a través da chamada dun particular que informou de que ardía unha vivenda unifamiliar na Lavacolla, na parroquia de Sabugueira (Santiago). Nese momento, os alertadores non podían confirmar se había persoas no interior.
De inmediato, os xestores do Centro Integrado de Atención ás Emerxencias solicitaron a colaboración de Urxencias Sanitarias de Galicia-061, os Bombeiros e as policías Nacional e Local de Santiago.
Os servizos sanitarios confirmaron o traslado dunha persoa que sufriu queimaduras, a bordo do helicóptero medicalizado con base en Santiago de Urxencias Sanitarias de Galicia-061.