- O BNG presentou publicamente este venres as propostas rexistras no Parlamento Galego contra o peche do centro
Membros do grupo municipal do BNG da Laracha, acompañados da deputada Mercedes Queixas, estiveron este venres presentando publicamente as iniciativas rexistradas no Parlamento Galego nas que demandan á Xunta de Galiza que dea marcha atrás na decisión de pechar a escola infantil de Montemaior, a última unitaria que queda no municipio.
Representantes da Federación de Anpas da Costa da Morte uníronse a un grupo de veciñas e veciños que se achegaron ao centro para expresar o seu malestar polo peche do mesmo, que conta con cinco nenos inscritos para o próximo curso escolar.
Para o BNG, a clausura desta escola, ademais de amosar o nulo interese do goberno do PP polo rural, supón «unha irresponsabilidade nun momento como o actual no que as escolas rurais son un valor engadido para a protección fronte a COVID», sinala o voceiro do grupo municipal do BNG na Laracha, Xoán M. Sande Muñiz.