A asociación Vieiro de Carballo dentro da súa programación de prevención de adiccións con e sen substancia, por mediación da súa educadora social, impartiu durante o pasado mes de marzo no centro de menores “A Milagrosa” de Carballo, un ciclo de talleres dirixidos a preadolescentes e adolescentes.
Na xornada do 15 de marzo e destinado a adolescentes, tivo lugar o taller que levou por título: “Sexo Sentido”. O seu obxectivo foi incrementar o nivel de coñecementos, habilidades e desenvolvemento de actitudes que contribúan a elevar o nivel de saúde sexual na poboación adolescente propiciando a diminución das condutas de risco na prevención de embarazos non desexados, así como enfermidades de transmisión sexual.
A segunda xornada, que se celebrou o día 22 de marzo, e dirixida a preadolescentes, levou por título “Mar de Redes”. Este taller versou sobre o uso seguro das novas tecnoloxías. O seu obxectivo é fomentar na poboación xuvenil o uso adecuado das TICs a través da toma de conciencia dos riscos do uso das novas tecnoloxías, dos posibles delitos, das súas consecuencias ou das formas de protexerse, así como previr o uso problemático da internet, das redes sociais e/ou outras prácticas de risco asociadas a estas tecnoloxías (videoxogos, apostas, xogos de azar online).