- O trazado recupera o camiño tradicional e parte do patrimonio etnográfico do lugar
O Concello de Vimianzo impulsou a recuperación dun antigo camiño en Berdoias para mellorar o trazado da Vía Mariana. Trátase do camiño de Carreixas, que parte da aldea de Berdoias en dirección a Muxía, no percorrido que antes se realizaba pola vía de servizo da inacabada autovía da Costa Morte.
No camiño aínda se conservan algún treito empedrado e crúzase un pequeno río sobre unha pontella á beira da cal se conserva un muíño en bo estado. Deste xeito, o trazado recupera o camiño tradicional e parte do patrimonio etnográfico do lugar.
Esta acción compleméntase cun roteiro de sendeirismo que se está a preparar para unir as aldeas de Berdoias e Boallo, co seu patrimonio arqueolóxico, histórico e etnolóxico. A alcaldesa, Mónica Rodríguez, destaca as tarefas ‘de todo o persoal implicado por recuperar o noso, algo tremendamente importante para nós’.