- Forman parte dun proxecto municipal para a recuperación do patrimonio
O Concello de Vimianzo continúa coa recuperación de elementos patrimoniais con varias cruces que dividían as parroquias antigamente. Foron os traballos de limpeza e roza os que deixaron ver ambos elementos situados en Ogas.
Un deles atópase en mal estado, coa base rota, polo que deberá ser reparado para devolvelo ao seu estado orixinal. Co segundo, que non se atopa no seu estado orixinal, procederase a efectuar labores de asentamento.
As cruces eran os elementos que antigamente se levantaban para cristianizar os lugares, así como para separar parroquias ou deslindar territorios. “Atopámonos estes dous elementos de sorpresa executando traballos de mantemento, e continuaremos pois poñendo en valor o noso patrimonio”, di a alcaldesa, Mónica Rodríguez.