Os autónomos que se achegan á xubilación e non teñen un familiar disposto a continuar o seu negocio poderían preparar a outro sucesor durante cinco anos sen pagar unha segunda cota. Polo menos, se o partido que forme o próximo Goberno fai caso da proposta da Federación Nacional de Asociacións de Traballadores Autónomos (ATA).
Esta, propuxo a todas as forzas políticas que concorren ás Eleccións Xerais do 29N permitir a existencia de autónomos colaboradores, alleos á familia, para evitar que miles de actividades viables pechen cando se retire o seu propietario.
“Durante os cinco anos previos ao retiro, a cotización asumiríaa o titular a través da propia actividade, pero sen duplicar custos nin subir a súa cota”, explicou a este diario Leticia Mingueza, asesora xurídica de ATA e presidenta da federación en Castela e León. Segundo a experta, ao redor do 35% dos autónomos supera os 55 anos, o que sen dúbida reforza a necesidade de preparar a substitución.
O propietario do negocio podería ensinar ao futuro titular como funciona a actividade mentres ambos participan na súa xestión, cun acordo que fixaría os prazos e as condicións económicas do traspaso.
O aprendiz xeraría os seus propios dereitos de cotización e, se o dono incumprise a substitución comprometida, a proposta contempla penalizacións sobre os incentivos recibidos.