A vicepresidenta terceira e ministra de Transición Ecolóxica,Sara Aagesen, confirmou este domingo desde o posto de mando avanzado de Navalcarnero que o incendio forestal de Burgohondo, no sueste de Ávila, é xa o maior incendio da historia de España desde que se teñen rexistros.
Os medios aéreos retomaron os labores de extinción a primeira hora deste domingo para tentar conter a extensión das lapas nas tres provincias, declaradas en emerxencia nacional. Hai 59.896 persoas evacuadas a 29.867 confinadas.
Neste triángulo, que abarca un perímetro de 280 quilómetros, arderon máis de 77.000 hectáreas. O lume de Burgohondo (Ávila), que arrasou 50.000, converteuse xa no maior da historia de España dende que se teñen rexistros.
O perímetro estase abordando con medios aéreos durante o día e unidades terrestres durante a noite co apoio de drons. Aagesen confirmou que continuarán as evacuacións de distintas localidades, a pesar da lixeira melloría na fronte grazas a un cambio nas condicións meteorolóxicas desde a noite do sábado, pero non puido precisar onde se producirán ata que non se confirme como e cara a onde evolucionará o lume.
En relación con este incendio, a Garda Civil detivo unha persoa e investiga outra. A Xunta de Castela e León anunciou que se vai personar como acusación no procedemento.
O presidente do Goberno, Pedro Sánchez, asegurou este domingo que a evolución está a ser positiva, con algúns focos xa «consolidados». Porén, recoñeceu que os equipos de extinción afrontan horas «moi complexas».