O presidente francés, Emmanuel Macron, perdeu este luns ao seu cuarto primeiro ministro desde xaneiro de 2024. François Bayrou, de 74 anos, non superou a moción de confianza que el mesmo promoveu e viu como a Asemblea Nacional tombaba o seu Executivo con 364 votos en contra fronte a 194 a favor. No debate parlamentario, Bayrou advertiu da “inexorable realidade” da débeda, que cifrou en 3,4 billóns de euros, e pediu un recorte de 44.000 millóns no déficit para 2026. Alertou de que Francia corre o risco de afundirse se non cambia de rumbo e reprochou á oposición que “ten poder para tombar ao Goberno, pero non para borrar a realidade”. O líder socialista Boris Vallaud acusou a Bayrou de “falsas promesas” e a Macron de ser responsable da crise política e económica, á vez que proclamou que “agora tócalle á esquerda gobernar”. A presidenta do grupo EcoloXista e Socialista, Cyrielle Chatelain, instou a Macron a aceptar a cohabitación e nomear un primeiro ministro da Nova Fronte Popular. A ultradereitista Marine Le Pen e Mathilde Panot, de Francia Insubmisa, sinalaron a Macron como principal culpable da crise e esixiron eleccións anticipadas. O presidente francés, Emmanuel Macron, nomeará «nos próximos días» un novo primeiro ministro para suplir a François Bayrou.
23