A Autoridade Portuaria da Coruña comezou os traballos de restauración do emblemático Faro do Roncudo, situado na parroquia de Corme. As obras son o resultado dunha petición expresa realizada polo goberno local co obxectivo de poñer en valor unha das zonas máis importantes e representativas do municipio. Esta actuación nace da estreita colaboración entre a Autoridade Portuaria e o Concello de Ponteceso.
O proxecto de restauración deseñouse baixo unha premisa fundamental baseada no respecto absoluto pola natureza. Deste xeito, a intervención ten como finalidade garantir que a contorna permaneza exactamente como está, mantendo a súa riqueza paisaxística e medioambiental. Ao mesmo tempo, preténdese converter o faro nun espazo accesible e seguro onde as familias de Ponteceso, así como os visitantes de fóra, poidan pasear e contemplar a maxestosa paisaxe da zona. A intención é que a cidadanía perciba un cambio positivo e unha clara mellora nas instalacións, pero asegurando en todo momento que o espazo natural queda totalmente protexido.
Desde o Concello de Ponteceso quérese poñer en valor a boa sintonía entre as administracións para facer realidade esta mellora. O goberno local agradece publicamente á Autoridade Portuaria da Coruña, particularmente ao seu presidente e ao seu equipo técnico, a súa total predisposición para escoitar a solicitude e o seu compromiso para sacar adiante esta obra tan demandada. “A restauración do Faro do Roncudo non só protexe o patrimonio marítimo de Corme, senón que consolida a aposta do Concello por un turismo sostible e de calidade, onde a natureza é a gran protagonista”, destaca o alcalde, José Manuel Mato.
O rexedor valorou o inicio dos traballos e sinalou que «o Faro do Roncudo é un dos grandes símbolos de Ponteceso e da Costa da Morte. Para nós era vital darlle o coidado que merece, pero sempre cunha liña vermella: o respecto absoluto pola nosa paisaxe».