Un novo instrumento tecnolóxico denominado DISCERN, en inglés (discernir), logra diferenciar entre distintos tipos de tumores cerebrais a partir da información que lle proporcionan as resonancias magnéticas. Os autores, científicos do Vall d’Hebron e do Hospital Universitario de Bellvitge (HUB), aproveitaron a aprendizaxe profunda, un método de Intelixencia Artifical (IA), para analizar toda a información espacial e temporal da resonancia estándar e identificar patróns de comportamento específicos.
Os resultados céntranse, polo momento, en tres tumores, que representan o 70% dos quistes malignos: o glioblastoma multiforme, as metástases cerebrais de tumores sólidos e o linfoma primario do sistema nervioso. Como ocorre nas aplicacións de IA, “cantos máis casos se ensinan á ferramenta mellor aprende e cando ve un novo caso resúltalle máis fácil identificar patróns”, precisou a doutora Raquel Pérez-López, unha das autoras do estudo. Neste sentido, DISCERN aprendeu as características destes tres tipos diferentes de tumor cerebral a partir de 50.000 vóxeles de 40 pacientes diagnosticados.
Actualmente, para confirmar o tipo de tumor é necesario na maioría dos casos someter ao paciente a procedementos neuroquirúrgicos co fin de obter unha biopsia. Con todo, este novo avance tecnolóxico, se se chegan a validar os resultados obtidos nun ensaio clínico, poderá utilizarse nun futuro na práctica clínica habitual.