O parque provincial de Arzúa interveu nun accidente de tráfico rexistrado no lugar de A Anduriña, na parroquia de Folladela, no Concello de Melide.
O aviso recibiuse informando dun sinistro cunha persoa ferida, pero non atrapada. Posteriormente, confirmouse a necesidade de excarceración do único ocupante do vehículo, polo que se mobilizou unha dotación de bombeiros.
O vehículo implicado saíuse da vía por unha ladeira duns oito metros e impactou contra varias árbores. A intervención dos bombeiros consistiu na retirada das portas e do tellado do vehículo, así como na protección do habitáculo, para proceder á excarceración da persoa ferida. A vítima, que presentaba un golpe na cabeza, foi posteriormente evacuada en padiola ata o helicóptero para o seu traslado ao hospital, xa que a ambulancia non podía acceder ao punto.
No operativo participaron tamén efectivos de Garda Civil de Santiago, Protección Civil de Melide, 061 e o equipo do helicóptero H3.