- Tiña 69 anos e levaba loitando contra esta enfermidade desde facía un ano
A xornalista Mila Ximénez (Sevilla, 1952) morreu este mércores, 23 de xuño, ao non superar un cancro de pulmón contra o que levaba loitando un ano. Faleceu aos 69 anos na súa casa arroupada polos seus irmáns e a súa filla Alba, segundo confirmou Telecinco.
A colaborada de Sálvame fixo pública a súa enfermidade o 16 de xuño de 2020 a través dunha chamada telefónica ao programa. Sempre optimista, semanas máis tarde tamén anunciou que sufría metástase no fígado e noutras partes do corpo.
Mila Ximénez foi moi coñecida nos anos 80 ao traballar en medios de gran relevancia como ABC ou tras participar no programa radiofónico de Encarna Sánchez. A exmuller do tenista español Manolo Santana atravesou duros momentos económicos pero logrou saír adiante ao facerse un oco en programas como Crónicas Marcianas, Aquí hay tomate ou Sálvame.