A Deputación da Coruña vén de licitar o proxecto para a creación dun miradoiro na área recreativa de Gabenlle, unha actuación que foi proposta polo Concello da Laracha para a súa inclusión no Plan de Sustentabilidade Turística en Destino (PSTD) “Os Fogóns do Anllóns”.
O proxecto, redactado pola Fundación Juana de Vega por solicitude municipal, presenta un orzamento de 20.000 euros e será financiado con fondos do Plan de Recuperación, Transformación e Resiliencia Next Generation EU, segundo o convenio entre a Axencia Turismo de Galicia e a Deputación da Coruña. O prazo de presentación de ofertas remata o 3 de decembro.
Un miradoiro pensado para reforzar o valor ambiental, paisaxístico e educativo do entorno
A intervención ten por finalidade poñer en valor a área recreativa de Gabenlle e facilitar a súa contemplación mediante un punto de observación integrado nese espazo natural xunto ao río Anllóns. Apóstase pola creación dun miradoiro que combine o desfrute da paisaxe coa educación ambiental, a arte na natureza e a mellora da biodiversidade seguindo criterios estritos de respecto e integración coa contorna.
O deseño baséase no uso de materiais naturais do propio lugar, especialmente troncos de piñeiro procedentes dunha entresaca forestal planificada para favorecer a transición cara un bosque mixto e de ribeira. A actuación contempla a plantación de especies autóctonas -freixos, bidueiros, carballos e castiñeiros- co obxectivo de diversificar o ecosistema e reforzar o seu valor ecolóxico.
A proposta inclúe a creación de:
- Camiños e pavimentos elaborados con toradas de madeira.
- Zonas de estancia e elementos de xogo natural.
- Bancada orientado ao río, concibida como espazo de descanso, encontro e observación.
- Hoteis de insectos integrados en estruturas de troncos, algúns deles intervidos cromaticamente para atraer polinizadores.
- Sistema de sinalización interpretativa, tamén en madeira, con información divulgativa sobre os servizos ecosistémicos e os valores naturais da área.
Recuperación ambiental e economía circular
A zona na que se creará o miradoiro é unha antiga plantación forestal de piñeiro, actualmente en desuso e con numerosos exemplares en mal estado. A intervención permitirá a súa recuperación ambiental aplicando criterios de economía circular mediante a reutilización da madeira resultante da entresaca, reducindo así a pegada de carbono da obra.
Todas as estruturas propoñen un impacto visual mínimo, empregando volumes lixeiros, materiais naturais e cores acordes coa paisaxe rural de Gabenlle.
Un proxecto ao servizo do turismo sostible
O PSTD “Os Fogóns do Anllóns” ten como obxectivo situar os concellos desa contorna fluvial como destinos de referencia en turismo de natureza e gastronómico, impulsando accións que melloren o estado do río e a súa capacidade para xerar experiencias turísticas de calidade. O miradoiro de Gabenlle encaixa nesta visión ao combinar conservación, educación e desfrute responsable do medio natural.