O Grupo Socialista insistiu hoxe na necesidade de que se primen os produtos de proximidade nos contratos públicos. O portavoz de pesca, Julio Abalde, reclamoulle hoxe á Xunta a través dunha pregunta na Comisión de Pesca, que aprobe unha estratexia de contratación co fin de, entre outros obxectivos, fomentar o consumo de produtos do mar procedentes da propia Galicia.
Abalde sinalou que, para os servizos de comedor de hospitais, centros escolares ou residencias de maiores, se debe establecer como criterio de adxudicación ou como condición especial de execución o uso de peixe galego, sinaladamente do cerco. “Esa é unha ferramenta que si podería empregar a Xunta, e lamentablemente no o está facendo”, afirmou.
O deputado do PSdeG recordou que o do mar “é un sector fundamental para a economía galega”, e que está atravesando “un mal momento”. A proposta do Partido Socialista serviría para apoiar o seu desenvolvemento. Julio Abalde lembrou tamén que o emprego de produtos de quilómetro cero tamén ten beneficios directos sobre o medio ambiente, posto que o impacto do seu transporte é menor, e sobre o emprego.