O Club Salvamento Acuático Laracha – SAL pechou os Campionatos Galegos de Praia cun balance excepcional, consolidándose entre as grandes referencias do salvamento e socorrismo galego grazas aos magníficos resultados acadados tanto a nivel colectivo como individual celebrados este fin de semana, dende o venres 10 ata o domingo 12 de xullo na Praia de Riazor (Coruña).
O gran protagonismo desta edición chegou nas clasificacións por clubs, onde o SAL conquistou dous títulos galegos, un podio e dous postos de máximo nivel fronte ás mellores entidades de Galicia.
Estes resultados confirman a excelente saúde deportiva do Club Salvamento Acuático Laracha – SAL, que mantén un alto nivel competitivo desde a base ata a categoría absoluta, situándose entre os clubs máis destacados de Galicia.
O equipo infantil completou un campionato extraordinario, proclamándose Campión Galego por Clubs e asinando unha gran actuación colectiva.
O SAL conseguiu dous títulos galegos, grazas ás vitorias do equipo feminino en Salvamento con Tubo de Rescate e do equipo masculino en Relevo de Táboa, ademais de cinco medallas de bronce en Relevo Sprint feminino, Relevo de Táboa feminino, Salvamento con Tubo masculino, Relevo Sprint masculino e Triada Mixta.
O conxunto cadete reafirmou o excelente momento do club proclamándose tamén Campión Galego por Clubs.
O club conquistou catro títulos galegos, cos triunfos dos equipos feminino en Salvamento con Tubo, masculino en Salvamento con Tubo e Rescate con Táboa, e mixto en Triada. Ademais, sumou dúas medallas de prata e un bronce.
A expedición xuvenil e júnior mantivo ao SAL entre os mellores clubs de Galicia, destacando o 3º posto por clubs na categoría júnior.
O SAL asinou unha excelente actuación nos relevos, destacando o ouro do equipo feminino júnior en Rescate con Táboa, sete medallas de prata e dous bronces nas distintas formacións xuvenís e júniors.
O equipo feminino acadou a prata en Rescate con Táboa e o bronce en Relevo de Táboa, mentres que o equipo masculino sumou tres bronces en Salvamento con Tubo, Relevo de Táboa e Relevo de Ski.
PECHE
Máis aló das medallas e das clasificacións, estes Campionatos Galegos representan a consolidación dun proxecto deportivo e humano que segue medrando ano tras ano. Os resultados acadados son a consecuencia dun traballo continuo orientado a cumprir a nosa misión: atraer e reter talento, ofrecer oportunidades de crecemento ás novas xeracións e formar persoas a través dos valores do salvamento e socorrismo.
O SAL é hoxe moito máis ca un club deportivo. É unha comunidade unida por un forte espírito de pertenza, onde deportistas, familias, persoal técnico, persoas voluntarias, patrocinadores, colaboradores e institucións que nos apoian camiñan na mesma dirección. Todos e cada un dos adestramentos, desprazamentos, competicións e pequenos esforzos individuais constrúen un proxecto colectivo que nos fai máis fortes.
A dirección do club quere expresar o seu máis sincero agradecemento a todas e cada unha das persoas que forman parte desta familia. Porque cada integrante, independentemente do seu papel, achegou o mellor de si para facer posible que o Club Salvamento Acuático Laracha continúe consolidándose como un dos grandes referentes do salvamento deportivo galego. Estes éxitos pertencen a todos.
Pero este campionato non supón un punto final. É un novo punto de partida. O traballo desenvolvido durante toda a tempada xa permitiu que numerosos deportistas do SAL obtivesen a clasificación para representar ao club nas próximas citas nacionais, un premio ao esforzo, á constancia e ao compromiso demostrados ao longo do ano.
A próxima fin de semana, do 17 ao 19 de xullo, o SAL estará presente no Campionato de España Estival Xuvenil, Júnior e Absoluto, que se celebrará en Noja (Cantabria). Tan só unha semana despois, do 24 ao 26 de xullo, será a quenda dos máis novos no Campionato de España Infantil e Cadete de Praia, en Laredo (Cantabria).
Con ilusión, humildade e ambición, o Club Salvamento Acuático Laracha afronta estes novos retos convencido de que o verdadeiro éxito non reside únicamente nos podios, senón na capacidade de seguir formando deportistas, fortalecendo a nosa comunidade e transmitindo uns valores que perduran moito máis alá da competición.
A tempada continúa, e con ela o noso compromiso de seguir formando persoas, facendo crecer o deporte e levando con orguio o nome da Laracha e de Galicia a cada novo reto deportivo.