O Sindicato Labrego Galego-Comisións Labregas (SLG-CCLL) fixo hoxe un chamamento a todo o sector agrario e ás habitantes do medio rural para que se sumen á Folga Xeral convocada o 11 de novembro baixo o lema “Galiza en loita por unha vida digna”. Así o anunciaron a secretaria xeral, María Ferreiro, e o secretario de acción sindical, Brais Álvarez, nunha rolda de prensa na que o sindicato advertiu da situación de “afogamento” que vive o sector produtor.
O SLG participará nas mobilizacións convocadas pola CIG con motivo da Folga Xeral en A Coruña, Santiago de Compostela, Ourense, Lugo, Vigo e A Estrada, onde acudirá con bloque propio. O sindicato chama labregas e labregos a unirse ás concentracións e manifestacións.
Custos disparados e prezos inxustos
O SLG lembra que o sector segue sen cobrar uns prezos xustos en ningunha orientación produtiva, mentres os custos de produción non deixan de subir. Desde febreiro, o prezo do gasóleo duplicouse, o que encarece o resto de insumos, e a seca deste verán agravou a situación. O sindicato reclama á Xunta unha interlocución constante e un plan inmediato, con medidas tamén a medio e longo prazo.
O Consello de Ministros anunciou a prórroga da bonificación do gasóleo agrícola ata o 31 de decembro, unha medida que o SLG considera totalmente insuficiente. Por iso, o sindicato participará na mobilización convocada diante do Ministerio de Agricultura o mércores 28 de outubro, en Madrid, para reclamar un plan de choque.
Lei da Cadea Alimentaria e PAC
O sindicato esixe o cumprimento real da Lei da Cadea Alimentaria e denuncia que a diferenza entre o que cobra a persoa produtora e o que paga a consumidora pode chegar ao 500%. Reclama que se aplique a prohibición de comprar por debaixo de custos, que se estendan os contratos e o rexistro a toda a cadea, e un réxime de sancións proporcionado: “Tres mil euros para unha empresa que factura centos de millóns non é nada”, sinalou Álvarez. Pide ademais que a Comisión Nacional dos Mercados e a Competencia investigue de oficio as marxes da gran
distribución, na que os cinco principais operadores controlan o 55% do mercado.
No eido europeo, o SLG reclama manter un orzamento sólido para a PAC, fronte á proposta que o recortaría arredor dun 20% para destinalo á militarización, e rexeita a aplicación provisional do tratado con Mercosur desde o 1 de abril.
Vivenda e servizos públicos no rural
O SLG presentou tamén unha declaración de apoio ás mobilizacións polo dereito á vivenda, co obxectivo de visibilizar que o rural non é alleo ao problema. Aínda que abunden as casas baleiras, o prezo, a especulación en zonas próximas a cidades e á costa, a dificultade de identificar propietarios e as herdanzas con varios titulares impiden o acceso a unha vivenda digna e dificultan o relevo xeracional. “A vivenda é indispensable, é onde temos o noso proxecto”, sinalou Ferreiro.
O sindicato esixe un banco de vivenda público no rural sen fins especulativos, un plan urxente de rehabilitación para compra ou aluguer social, e axudas específicas, separadas das de incorporación, para as persoas mozas que queiran iniciar unha actividade agraria. Reclama tamén a devolución e blindaxe dos servizos públicos esenciais (sanidade, educación, transporte, coidados e lecer) nas comarcas rurais.
Propostas agrarias para a nova lexislatura
A Dirección Nacional do SLG, formada por preto de setenta persoas de todas as zonas produtoras, elaborou un documento de propostas agrarias para o medio rural para a lexislatura 2026-2030. O sindicato presentarao de xeito conxunto ás forzas políticas que concorren ás eleccións do 29 de novembro, ás que convida a participar nun espazo de debate para que o rural teña cabida na campaña. O encontro terá lugar o vindeiro día 7 de novembro.
O documento propón, a curto prazo, manter as axudas ao gasóleo, pero tamén un cambio de modelo: un plan estatal de redución da dependencia do petróleo e observatorios de insumos que frean a especulación. O SLG critica que os pastos permanentes queden fóra das axudas aos fertilizantes. “Non ten sentido, a nivel social, que se subvencione precisamente a quen máis dependente é dos combustibles fósiles”, sinalou Brais Álvarez.
O sindicato reclama ademais protexer a terra agraria, con ao menos un terzo da superficie agraria útil destinada a modelos agroecolóxicos, e frear a entrada de grandes fondos e adegas que pagan o dobre pola terra en zonas como o Ribeiro ou o Baixo Miño. Pide tamén axilizar as axudas de incorporación, que seguen sen resolverse desde 2025, con exención no IRPF e libre amortización para as persoas mozas, e que a PAC pague por agricultura activa e non só por hectárea, xa que máis da metade das titulares das explotacións gandeiras galegas son mulleres e soportan unha brecha nas axudas.
Tamén esixe melloras na Seguridade Social Agraria, como a exención de cotización desde o primeiro día de incapacidade temporal, un cese de actividade accesible e coeficientes redutores da idade de xubilación.
Por último, o SLG alertou de que en 2013 se solicitaban 35.871 PAC en Galicia e en 2026 foron 21.123, unha perda arredor do 40% en trece anos, e de que nos próximos dez anos só se incorporarán tres mozas e mozos por cada dez persoas que abandonen a actividade.