O salón de plenos do Concello de Carballo acolleu este luns á expedición de 60 deportistas infantís que representaron ao municipio nos Xogos do Eixo Atlántico, celebrados en Santiago de Compostela. O acto, cargado de recoñecemento, serviu para poñer en valor tanto os notables éxitos deportivos acadados como, sobre todo, os valores humanos amosados polos mozos e mozas durante as cinco xornadas de competición.
O alcalde de Carballo, Daniel Pérez, expresou o seu orgullo e trasladou o seu agradecemento “ás familias, aos directivos dos clubs e aos adestradores” polo seu constante apoio ao deporte base. Dirixíndose de xeito directo aos deportistas, doulles os parabéns polo seu comportamento: “Sodes un exemplo e un modelo para Carballo. Competimos con grandes cidades, fixémolo ben e desfrutamos, que é o realmente importante”. Así mesmo, animou á mocidade a seguir practicando deporte e agradeceu que “leven o nome de Carballo a todas partes” con tanta dignidade.
Na mesma liña manifestouse o concelleiro de Deportes, Daniel Barreiro, quen estivo acompañando á delegación ao longo da semana na capital galega. Barreiro fixo un balance moi positivo da experiencia, e destacou que máis alá dos resultados no marcador, estes xogos serviron para que as 15 promesas en modalidades individuais e os 45 xogadores de disciplinas de equipo “tezan lazos de amizade coa mocidade de decenas de municipios das dúas beiras do Miño, reforzando a súa formación humana”.
Pola súa banda, o técnico municipal de Deportes, Manuel Varela Bardanca, felicitou ao grupo polos triunfos deportivos, pero fixo especial fincapé “no comportamento e o bo ambiente” reinante en todo momento. Para rematar, Bardanca quixo poñerlles uns “deberes” moi especiais de cara ao verán: “Que animedes aos vosos pais e nais a facer tamén deporte”.
A representación carballesa nesta edición dos Xogos do Eixo Atlántico estivo composta por catro grandes disciplinas na categoría infantil: balonmán, baloncesto, atletismo e natación, con 60 deportistas en total. Con cinco medallas (catro ouros e unha prata) no peto e o recoñecemento unánime pola súa deportividade, a canteira local demostra unha vez máis a vitalidade e o excelente traballo diario que se realiza nas escolas e clubs deportivos de Carballo.