O Ministerio de Sanidade elaborará unha lei para protexer aos menores dos efectos nocivos do alcol, afirmou o ministro do ramo, Salvador Illa, durante a súa primeira comparecencia no Congreso dos Deputados para presentar o programa de traballo do seu departamento na actual lexislatura. Segundo o ministro, a prevención do consumo de alcol en mozos é outra das liñas nas que Sanidade pretende incidir de maneira clara e, neste sentido, anunciou “unha lei para protexer aos nenos, nenas e adolescentes dos efectos nocivos do alcol”.
Dita lei, engadiu Illa, contemplará medidas como incidir e profundar na limitación do acceso dos menores ás bebidas alcohólicas; establecer maiores límites na publicidade, incluídos os puntos de venda, e favorecer un cambio cultural que permita percibir con maior claridade os riscos do consumo de alcol. Medidas que demostraron a súa efectividade noutros países. “Especialmente, preocúpanos ser efectivos na prevención do consumo de alcol nos mozos, xa que os datos dos que dispoñemos poñen de manifesto algunhas conclusións preocupantes”.
De feito, engadiu, Salvador Illa, “entre os mozos en España hai unha baixa percepción dos riscos do alcol para a saúde, a idade de inicio ao consumo é moi baixa (14 anos) e, ademais, os menores inxeren grandes cantidades, sobre todo durante as fins de semana”.