Toman posesión do seu cargo dous novos axentes da Policía Local de Carballo

Cedida.

Os dous axentes veñen de ser nomeados pola Academia Galega de Seguridade para ocupar as prazas convocadas polo Concello de Carballo polo sistema de mobilidade, e este martes tomaron posesión do cargo nun acto ao que asistiron o alcalde, Evencio Ferrero; o concelleiro de Seguridade, Juan Seoane; o secretario do Concello de Carballo, Miguel Piñeiro, e os oficiais José Luis Caamaño e Pedro José Cancela.

Con estas incorporacións, o equipo de profesionais da Policía Local queda formado por 23 axentes e 4 oficiais, ademais dos auxiliares que prestan servizo ao longo do ano. Nestes momentos está pendente o nomeamento dun terceiro axente, xa que na convocatoria do Concello de Carballo figuraba unha terceira praza polo sistema de oposición libre. A outra praza que falta ata completar as 25 que integran o plantel da Policía Local corresponde a unha axente que está traballando noutro concello en comisión de servizos.

O alcalde desexou aos novos axentes unha longa carreira profesional no concello e que teñan pouco traballo, porque iso sería sinónimo de benestar e tranquilidade para toda a cidadanía. O concelleiro de Seguridade, Juan Seoane, destacou que o incremento do persoal permitirá reforzar a presenza dos axentes nas rúas e, en consecuencia, mellorar o servizo á cidadanía.