UCIN Santiago defende a creación da figura do Axente Cívico como unha medida preventiva destinada a mellorar a convivencia cidadá, informar ás persoas visitantes e coidar o espazo público durante os períodos de maior presión turística na cidade.
Nas tempadas de maior afluencia —Semana Santa, verán e Ano Xacobeo— prodúcense situacións de saturación, desinformación e pequenos conflitos de convivencia que non sempre se solucionan unicamente con sancións. Por iso, UCIN aposta por un modelo baseado na educación, a prevención e a mediación.
Informar, previr e mediar
A figura do Axente Cívico tería como principais funcións:
- Orientar ás persoas visitantes sobre normas básicas de convivencia e uso do espazo público.
- Previr comportamentos incívicos mediante presenza activa, diálogo e proximidade.
- Actuar como mediador entre veciñanza, turistas e comercio local.
- Reforzar a imaxe dunha cidade acolledora, respectuosa e non represiva.
UCIN propón que estes axentes conten con formación en atención ao público, idiomas, patrimonio e convivencia urbana, e que a súa actividade se concentre nos puntos con maior presenza de visitantes.
“Non se trata de multar máis, senón de explicar mellor. A educación e a información funcionan mellor ca a sanción cando falamos de convivencia”, sinalan desde UCIN Santiago.
O coordinador de UCIN Santiago, Diego Adrián Mallo, engade:
“Santiago necesita ferramentas modernas para xestionar o turismo sen perder a súa identidade nin a calidade de vida da veciñanza. O Axente Cívico sería unha ponte entre visitantes e cidadanía, apostando pola convivencia, o respecto e un modelo de cidade máis humano.”
Esta medida permitiría reducir conflitos, mellorar a experiencia turística e aliviar a presión sobre os servizos municipais, apostando por un turismo máis humano, responsable e sostible para Santiago de Compostela.