A iniciativa foi abordada nunha reunión celebrada no coworking da Laracha, na que participaron a xerente de Suelo Empresarial del Atlántico (SEA), Beatriz Sestayo, e o responsable da área comercial, José Rey; o alcalde, José Manuel López, o concelleiro de Urbanismo, Pablo Cambón, técnicos municipais e empresarios que forman parte da agrupación industrial. Durante o encontro, analizáronse as condicións do chan e as posibilidades de desenvolvemento do proxecto no municipio.
A agrupación industrial expón a ocupación duns 150.000 metros cadrados, o que representa practicamente a metade da ampliación prevista para o polígono empresarial. O proxecto contempla a construción de sete naves industriais e un circuíto de test road, configurando un complexo especializado que podería converterse nun referente do sector. A iniciativa podería contar con capital estranxeiro e coa participación de empresas españolas, co obxectivo de xerar valor engadido ao produto industrial.
A Laracha sitúase como unha das candidaturas máis firmes para albergar este complexo, grazas ás condicións do polígono, que permiten deseñar o chan e as infraestruturas «a medida» das necesidades empresariais, tal e como explicou Beatriz Sestayo. A iso súmanse os excelentes accesos aos portos exteriores, especialmente ao da Coruña, así como a presenza de grandes empresas e amplas bolsas de chan dispoñibles no municipio.
Desde Suelo Empresarial del Atlántico, Sestayo subliñou o compromiso da entidade con este tipo de iniciativas: «Desde SEA dicir que apoiamos e impulsamos a creación de empresas, brindando información e apoio loxístico e institucional», afirmou. Ademais, a xerente de Suelo Empresarial del Atlántico quixo resaltar que os trámites para iniciar a ampliación do parque avanzan a bo ritmo. Tras a aprobación do informe ambiental o pasado mes de maio, a entidade estatal xa presentou o Plan Estructurante con todos os requirimentos esixidos pola Xunta de Galicia e está á espera da súa aprobación.
Pola súa banda, o alcalde da Laracha, valora moi positivamente este proxecto, que reforzaría o posicionamento do municipio como enclave estratéxico para a industria, impulsando o desenvolvemento económico e a xeración de emprego de calidade na comarca.
11