O Consello da Xunta deu luz verde ao proxecto de trazado da variante de Carballo, unha infraestrutura que se vai crear co obxectivo de contar cunha vía de circunvalación polo sueste do núcleo urbano de Carballo. Esta actuación permitirá conectar o parque empresarial de Bértoa, a estrada AC-552 e o enlace Carballo leste da AG-55 coas vías DP-1914 preto da Brea e AC-413 preto de Verdillo. A aprobación definitiva deste proxecto tamén implica a declaración de utilidade pública.
Unha vez completado o trazado, iniciarase a redacción do proxecto construtivo para poder materializar a execución das obras. Esta actuación mellorará o servizo ao polígono de Bértoa, un importante motor económico para Carballo. Ademais, evitará o paso de vehículos pesados polo centro urbano, en particular polas inmediacións do instituto Alfredo Brañas, do colexio Fogar e do complexo deportivo. A variante incluirá dous carrís de 3,50 metros, beiravías de 1,5 metros e bermas de 1 metro. As estruturas previstas comprenden un viaduto de 340 metros sobre o río Anllóns, dous pasos superiores e un paso inferior de 10×4,5 metros. Contará tamén cun muro de contención e un marco para o rego do Añón. As dúas glorietas, de 60 e 70 metros de diámetro, terán dous carrís e estarán situadas nas interseccións coa AC-413, preto de Verdillo e a DP-1914, preto da Brea.