Unha persoa perdeu a vida na madrugada deste domingo nun accidente de tráfico ocorrido na estrada LU-612, entre os puntos quilométricos 8 e 9, ao seu paso pola parroquia de San Xoán do Campo, no termo municipal de Lugo.
O 112 Galicia tivo constancia do sinistro ás 00:45 horas, a través do aviso dun smartphone que informaba dun accidente de gravidade.
De inmediato, desde o Centro Integrado de Atención ás Emerxencias 112 Galicia activouse un operativo no que participaron o Servizo de Urxencias Sanitarias de Galicia-061, axentes da Garda Civil de Tráfico, da Policía Nacional e Local, ademais dos efectivos de Protección Civil.
Nun primeiro momento, barallouse a posibilidade de que a persoa implicada estivese atrapada no interior do vehículo, polo que se solicitou a intervención dos Bombeiros de Lugo. Porén, finalmente, non foi necesaria a súa actuación.
Con todo, o persoal sanitario confirmou o falecemento da persoa no lugar do accidente.
Atropelo mortal en Noia
Unha muller de case 80 anos faleceu na tarde deste domingo no concello de Noia cando ía subir ao coche do seu home no lugar de Sobreviñas. Malia a rápida intervención dos servizos sanitarios, nada se puido facer por salvarlle a vida.
Veciña da localidade, morreu sobre as 18:00 horas no quilómetro 1 da estrada DP-1105, na parroquia de Argalo, xusto cando se dispoñía a abandonar a zona onde ten propiedades.
O condutor do vehículo que atropelou a muller é un veciño de Lousame. No operativo participaron o 061, os Bombeiros de Boiro, o GES de Noia, a Garda Civil, a Policía Local e Protección Civil.